عيـــد بن سعـــيد :p

كل عام وانتم بخير خخخخخ ادري بدري
ماهنالي الا اكتب عن العيد الا اليوم
مع اني ماحسيت بالعيد في الرياض الا يوم اول مره اروح للمسجد واصلي صلاة العيد

وكانوا معنا بنات عمي دخلنا للمسجد وماشاءالله مليان من الحريم اتخذنا مكان لنا وجلسنا فيه ماشاءالله بعضهم طاقات الزينه و الميك اب والشعر وبعضهم على شهابهم وجايين << ايه حنا من ذي الفئه خخخخخخخ وش نسوي ابوي وعمي وهم على اعصابهم يالله( ابد سعوديين مايصبرون على حريمهم ) هم لبسوا ثوبهم وخلاص ترى بنروح عنكم واستعجلنا

المهم زي ماقلت داخليين وطبعا عادة الحريم ماشاءالله بعضهم يوزعون عيدياتهم للاطفال مع امهاتهم اللي داخل المسجد ماشاءالله على اجر ان شاءالله ووزعنا عيديات عليهم وهذي حصيلتنا حمولتنا

الكرام 3 بنات صغار

وحتى لنا نصيب من العيديات لوووول

شفتوا كيس فله من بين عيديات البنات ؟

هذي صارت عليها مشكله وقنبله نوويه فيه ..صرخت حرمه كبيرة بالسن فجأه وهي تقول :من هي الآآآثمه الكافره اللي جابت ذي الاكياس اللي فيها ارواح للمسجد حسبي الله عليها تبينا نصلي مع اكياس فيها ارواح وين الحارس حق المسجد عشان يمنعكم من دخول المسجد هذي الاشياء معكم حسبيييييييي الله عليكم

حصل سكوت مفاجئ والناس نظراتهم متوجهه لها وهي تصارخ فجاه قامت وحده تقول الله يهديك مايجوز تقولين لاختك المسلمه كافره وبالمسجد بعد ,,هي قالت ذي الكلمه الا وهي صارخت :هي لو انها مسلمه مادخلت ذي الاكياس في المسجد ... وفجأة قامت وبسرعه تلم الاكياس من بي الاطفال والحريم بالقووووه وتكب الحلاو اللي فيها وعيون الاطفال مرعوبين من الخوف وقسم بالله انهم ينتفضون منها وهي تاخذ الاكياس وتكب اللي فيها ولا وزاها احد تحتهم او من خلفهم قالت : انا شاييييييييفته لاتوزينه لاتوزينه هاتيه وتاخذه خخخخخ حتى الشغاله ماسلمت : هذا حق بيبي ليش كذا مسكين قالت اص يلا مابقى الا انتي تتحكين واخذت الكيس

وجمعت الاكياس بيدها منتصره وطلعت الظاهر برى وكانت تاخذ من بقية الاكياس اللي جالسين هناك واختي وبنات عمي اللي بسرعه من ذيك الهوشه عطوها عشان ماتاخذها هناك من بين الزحمه ومعهم خخخخخخ جتهم وقالت هاتي الكيس وهي ماتدري وش السالفه... قالت وليش؟ صرخت قالت اقولك هاتي الكيسسسسسسس هذا لايجوز بالمسجد قالت انا برى المسجد ومنيب معطيتك ياه ههههههه خبله

الين استسلمت وراحت

قبل مايكبر للصلاة ومسكتها امي يوم مرت من عندها قالت الله يهديك ياختي ليه تسوين كذا الامر بالمعروف مب بالصراخ ولاهو بالقوه بالاول الكلام الطيب والمعامله الحسنه حتى ماينفر منك زي ماشفتي قالت : انا جليسة بن باااز اسمعله دايم واقراله ماقدر ان شفت المنكر ماتحمل ,,, قالت امي : مااشاءالله بس انتي الله يهديك رفعتي ضغطك وتحمستي مب زين لصحتك ترى وبالهداوه كلش يصير

قالت : ماقدر هذا اللي ينفع فيهم هذا الاسلوب .. انا مره شفت حرمه ونصحتها بالسوق وقالت لي فكي وجهك انا اعرفك واعرف صوتك الله يسلمك ويوم فكيته لها الغطا تفلت علي

وكبر التكبيره الاولى وراحت بعد هذي المناقشه خخخخخخخ

وصلينا وجلس يخطب .. وكنا نسمع الخطبه عن العيد وكيف ان سنه الرسول ان راح بطريقه للمسجد يرجع من طريق ثاني .. المهم حلوه الخطبه

و لاشفنا احد نعرفه نسلم عليهم طبيعي ......... والحريم يسلمون بعضهم اللي يعرفونهم جت وقالت الناس يسمعون للخطبه ولا يسلموووون ؟

الله يهديها مالها داعي تقول كذا لان طبيعة الحال عيب نشوف احد ولا نسلم عليه احراج والسلام واجب صح ولالا ؟؟؟؟

يعني هي معها حق في الاكياس بس مو هذا الاسلوب اللي ينفر بالواحد من نصحها له الله يهديها

والحمدلله صلنا ورجعنا لبيوتنا سالمين خخخخخخ

افطرنا ونمنا الين جا عيدنا عيد الاهل وكشخنا باللبس الجديد ورحنا والحمدالله انبسطنا بكشختنا خخخخخخخ مع انه هم يوم لقيته تدرون رجعت لبسي مرتين كنت ابلبس شي جديد مالبسته بس فكرت انه مايصلح واخر يوم من بكرى العيد لقيت ولله الحمد

<< كلن على همه سرى :D

I am B a c K to My B l o o g ^_^

هناك بعض الصور بالكلمات باللون الاحمر رجاء تفرج عليها :p

السلام عليكم حتى لو يطول لقائي بكم ها أنا اشتاق اليكم <<< اخس وش هالحتسي اللي اقوله :p

شكرا لكل من راسلني وسأل عني وسأل عن مدونتي لاتحظرني اسماءهم الآن لكن مشكورين والله فيكم خير من جد وواصلين ماشاءالله عليكم وفرحتوني وحسستوني ان عندي مدونه ومهملتها :( قسمن ماستحي على وجهي ادري نسيت اقولكم كل عام وانتم بخير بعد الزحمات والعشر الاواخرو عيدكم مبارك مره وحده

الحين وفيه اشيااااااااء ودي اكتبها من ايام الاجازه بس مادري ان كانكم وسيعين صدر والنفس طيبه عليكم ابكتبها وامري لله بالبدايه ابتكلم عن الاجازه الصيفيه اللي رحنا فيها مابين الشارقه ودبي وماكانت جايه في بالنا ابد ان نروح لها وكنا متأملين ان بنحرس الرياض لكن الحمدالله رحنا من اجمل الدول العربيه والخليجيه تطورا صدق من قال دبي دانة الدنيا من جدماشاءالله عليهم فيهم تطور قوي بالنهضه العمرانيه << موكاني اكتب درس جغرافيا

بس والله حبيت العماير وناطحات السحاب واسواقهم شي جميل ونفخر كخليحين انها صارت تنافس الدول الاوربيه بحداثتها وتطورها صح انه اكثر شي اسواق بس حبيناها اذكر من زمان مارحت لها كان فيها خضار صراحه اذكر ذا ك المكان اللي بدلوه بعماير وطلعت حفريات كثيره
وتغبر السياره دايم من الحفريات اللي دايم نجيها لطريق فندقنا
وماشاءالله عليهن من يقومون بعماره الا وهي قاضيه بالشهور وهي ناطحه سحاب
رحنا للأسواق شي راقي صراحه احلى شي عجبني شكله مركز ابن بطوطه وتصميماته من داخل والاشياء اللي فيه جميله تقريبا في بعض المحلات والماركات التي لم توجد لدى سعوديتنا و مركز ميركاتو ايضا من الداخل جميل وفيه ماركات بس السوق مو ذاك الدرجه بس حبيت شكله وحليو نوعا ما
ممممم ايضا لاأخفي عنكم حبي للمطاعم الموجوده والمتنوعه في دبي اهم المطاعم التي زرتها وعجبتني من هذا الايراني المميز مطعم حاتم صراحه ممتاز جدا واكله لذيذ وحتى سعره مناسب وايضا صدف بس اعجبني حاتم اكثر وجربنا بعد شاميانا موشين اكله اما من ناحيه مطاعم منوعه منها جربنا مطعم اونو و كوكوز رهيب اكثر ماعجبتني شوربة البروكلي اللي بالخبز لووووول :p

طبعا لايخلو من مواقف من ابناء سعوديتنا :في السوق كان هناك بنات سعوديات ولابسين العبايات ودخلوا الحمامات الله يكرمكم شوي واحنا داخلين المحل الا ونفس البنات دخلوا بدون عبايات ويوم شافونا انحاشو هههههههه

موقف ثاني مع اللقااااااافه كنا ننتظر اخوي الصغير يطلع من فلم وكان اخر فلم ينعرض بالليل المهم تجي وحده تروع وكشتها طالعه من النوع الشوشه الملفلفه ومتلثمه على فمها مدري وش الحكمه تجيك ممن اللقافه ماتدري وش تقول قالت متى يخلصون الفلم هذا الاخير قلنا مدري مابعد شوي وسكتت قالت انتم من العايله الفلانيه ماعطيناها وجه ههههههههههه

الموقف الاخر ايضا : في الفندق كان هناك مسبح طبعا ونتفاجا بمنظر لا يقبله العقل ويشوف ذا المنظر فجأه شياب سعوديين مع عيالهم لابسين الوزار وطابين بالمسبح ؟؟؟؟ الله يفشلكم ماتكفيكم ثمامتكم ؟؟ جايين فندق محترم طابين بوزااااار شوي من الفشيله وياخزياه ان يجي المدير ومعه الامن يبون يطلعونه وارتفعت الاصوات مابين عناد السعوديين انهم ماخطو وبين المدير المسؤول وقالهم بالحرف الواحد ان هالمنظر مانقبله في فندقنا وان ماعجبكم اطلعوا برى وبعد دقائق نشوفهم هم وبزراينهم وحريمهم يطلعون من الفندق يستاهلون هههههههه بس يقطع ام الفشيله مكان محترم وغير بلدك :\

نسيت اقول عن الولد وامه اللي محل الماركات كان فيه محل نسيت اسمه يجمع بكل الماركات جت وسالت عن نظاره ماذكر وش ماركتها بس اتوقع برادا قالت بكم قالها بالف وستميه شوي الا وجت عند شال بيربري وقالت هذا بكم وهي باين انها تتفرج مب راعية شرى شوي وتسال عن ساعه ماذكر وش ماركتها قالها ب3 الاف الولد من كثر ماشاف امه تسال وطولت مل قام وقعد على الارض ويأشر على اللي اشرت عليه امه يقول :اافف هذا بالف وهذا بالفين وهذا ب3الاف وكل شيييييي بالاف خخخخخخخخخ

فبعد هذا القرقر الزايد بقولكم عن الاحداث الي صارت لنا وتبهذلنا فيها وحسيت كنا مشردين :( بسم الله علينا
اول حدث المعامله السئيه جدا من قبل الشرطه ومرور دبي والامن بشكل عام ولانه حاصله بعد في اخوي الكبير الذي قامو بمنعه من السفر وحبس جوازه بتهمه انه رد على الشرطي الابله لمدة 6 اشهر لاتقعدون تقولون لي هذا هندي او ايراني لاااا هذا اماراتي ومن ابناء البلد بسبة واحد صدمه ووضعله التهمه قام اخي بالدفاع عن نفسه بالطيب بالعافيه ابد انت مخطي بعد رجوعه من السفر حرم انه يجي ابد لها :(

الله يهديهم يااااهم يكرهونا كره لدرجة اول مايشوفون سعودي ماكانهم اخوان او اهل ويتنيذلون في اشياء تافهه كطريقنا للمطار كنا بنلف زي حال خلق الله وكان فيه شرطي واقف هو وياوجهه على باله يمشي السير يوم شافنا قام يمنعنا من المروراللي كان طريقنا منها ويمشي السيارات الاماراتيين الغريب ان سيارتنا مستأجره وليس فيها ستيكر خاص بالاجره بس مدري كيف عرفنا وفيه سيارات سعوديه قام بمنع المرور عنها لنفس طريق المطار!!

المرحله الثانيه من التبهذل احنا تكنسلت علينا رحلتنا بالطياره لسبب مجهول قمنا انحسنا صراحه ولافيه رحله لنا قمنا باخذ رحله الى البحرين على اساس منها الوصول الى رحله اخرى او نروح للدمام لانه قريبه طبعا منها ونطلع لمطارها أخوي راح يرجع السياره لمكتب الاجار وهناك تاخر بسبة المخالفات اللي عليه حطنا بالمطار وهو يسلم السياره وهذا اكبر خطأ المفروض رحنا وديناها من زمان بس تاخرنا بسبة مطعم للغداء وزحماااااات ماتوقعنا اننا نواجه كذا مواقف متعكرفه تحول الوصول الى ديرتنا سالمين :( طبعا اخوي جلس بالمكتب وطول وفاتتته الرحله يوم هو راح المطار وراح بالعافيه طلع له تذكره الى السعوديه وسبحان الله وحنا مالقيناها بس يسرله الله ماشااءلله المسكين يروي لي بعظمه لسانه على مايقوولون اول مايبي يروح لرحلته وقفوه عند البوابه في الجوازات اوكي شوي ويطالع في وجهه ويناظر بالجواز قاله انت بتستنى معانا شوي ويمكن ماتروح لرحلتك ترى قال ايش !!انهبل قال وكييف ماروح وش صاير وكل اوراقي كامله وجوازي بيدي والتذكره قدامك قال شوي استنى بالكراسي الين نطلبك قعد بالكرسي شوي ويجيه ذاك اللي مسوي روحه اف بي اي السماعه باذنه والبدله السوداء اللي يلبسها كانه من فيلم مين ان بلاك قال لو سمحت اخوي انت فلان الفلاني قال ايه قال ممكن تطلع موبايلاتك كلها اللي أوم كيمراااا ووراه الجوال اللي معه قال هذا بس ؟ متاأكد ؟ قال ايه هذا اللي معي وش سالفة الجوالات فهمني وعفشي راح مع اهلي اللي فاتتني رحلتهم وهذا وانتم بتاخروني عن الرحله اللي بتجي قال انت منت متحرك من هنا ويمكن تطول معنا بعد قال وليش؟؟ وش مسوي قال سير ويانا نبا نفتشك قال اخوي له ان كان عندك شي قوله هنا قدام الناس انا مو خايف ولا سويت شي وشوي الا واتجمعت الناس على ذا المنظر من جميع انحاء البلاد وراح لغرفه ويلقا سعودي معه مرته ويفتشونهم وفتشوه ولا لقى شي قام يكلم بالسماعات حقته ويقول لرفيقه اللي معه على الخط احنا مالقينا شي في المشتبه وعفشه رايح قال وشلون يعني اروح ولا كيف عقب مافتشتوني قال بشوف وقعد يشاور خويه الين قال خلاص روح

تخيلوا تاخرت الطياره عشر دقايق من تفتيشهم له ويقول والله كاني مجرم لدرجة انه مرسلين وراي شرطي يشوفني وين قعدت وبعدها قفل البوابه والناس يناظرون فيني يحسبون اني مسوي شي او مجرم او ارهابي وحلف انه مايطبه هو الثاني ودعا الله انه مايكون يحتاج لهاولا يروح لها من سبة اللي شافه

القرقر المفيد من هذا الموضوع هوتعامل الاخوه الاماراتيين من الشرطه وكرههم للسعودين الملاحظ صراحه باللي شفناه واذكر حادثه قد قريته بالجريده انه سعودي مسجل شريحه باسمه في دبي ورماها لانه خلاص بيسافر للسعوديه وطاحت بين يدين لعاب وقام يسب في شخصيه معروفه ومهمه بالبلاد لانهم مايدرون من هذا بس باسم السعودي يوم جا لقضاء رحله هو وزوجته واطفاله تفاجا بسحبه بالقوه في منظر رعب قدام عائلته وكانه مطلوب هام ومايسوى روعته المثير في الامر الشخصيه المهمه رفعت قضيه عليه ومنعته من السفر وطالبوه بتعويض وسجنوه على ماعتقد يوم راح لمحامي قال اخوي في قضايا اهم منك وسامحنا مانقدر عليك والله يسر امرك!!!!

ملاحظه لونها أحمر: انا لا أحمل كرها ولا بغضا للاخوه والاخوات الاماراتين هم اصلن اهلنا وكلنا بلد واحد وشعب واحد ولدي صديقات اماراتيات وش كثرهم ومليون ونعم فيهم واتمنى احترام الرأي ووجهة النظر واللي كتبته وانه لايفسد من الود قضيه

:)